39 qytetarë të Kosovës të ngujuar jashtë vendit janë kthyer sot në mëngjes.
Ministri i Infrastrukturës dhe Ambientit, Lumir Abdixhiku bëri të ditur se prej tyre kishte fëmijë, të moshuar, gra e burra.
Ai tutje shtoi se dje u kthye edhe ekipi Kombëtar i Boksit dhe se të gjithë do të vendosen në karantinë 14 ditore në Qendrën Studentore në Prishtinë, raporton Indeksonline.
“Kthimi i qytetarëve të evidentuar nga ambasadat tona jashtë, në mënyrë të kujdesshme, të organizuar e pa rrezik për qytetarët këtu – do të vazhdojë. Këtë punë do ta bëjmë dhe zhvillimet tjera s’janë brenga e jona tani.E falenderoj Ministrin Quni dhe Ushtrinë e Kosovës që menjëherë dhe me profesionalizëm po na ndihmojnë”, theksoi Abdixhiku.
Ai gjithashtu tha se qytetarët e ngujuar jashtë, që në urgjencë duan të kthehen në Kosovë, duhet të vazhdojnë të kontaktojnë ambasadat tona.
“Secili i kthyer do të vendoset në Konvikte për 14 ditë”, rikujtoi ai.
Të gjitha këto masa me karantinim po ndërmerren në mënyrë që shanset për përhapjen e këtij virusi të jenë sa më të vogla.