Ende nuk dihet saktësisht pse dhe kush e shpiku njohjen nga shteti i Xhamajkës, shkruan “Kosovarja”.
Ajo çka dihet është se ka ndodhur një skandal diplomatik i Kosovës. Pa u verifikuar njohja, presidenti Thaçi e konfirmoi i pari njohjen nga Xhamajka!
Dhe, i besuan të gjithë… Kryeministri Kurti e falënderoi menjëherë Xhamajkën për këtë hap të rëndësishëm që i ndodhi Kosovës. Pra, për një njohje pas dy vjetësh.
Ish-ministri i Punëve të Jashtme, Behgjet Pacolli, po ashtu, publikoi një foto me ministrin e jashtëm të Xhamajkës!
Dhe, duke e uruar, deshi të thoshte se ai kaherë e dinte që kjo do të ndodhte, sepse ishte edhe meritë e tij…
Ish-kryeministri, Ramush Haradinaj, po ashtu, falënderoi Xhamajkën dhe e mori pak meritë për vete, duke thënë se qeveria e tij ishte meritore për këtë njohje…
Hashim Thaçi, madje, shkoi edhe më larg. E falënderoi edhe Eliot Engelin, kongresistin me prejardhje shqiptare në SHBA, për një lobim të suksesshëm.
Ndërkaq, ministri i Jashtëm i Kosovës, Glauk Konjufca, paralajmëroi diçka, e që i shkon për aludim Vlora Çitakut rreth këtij skandali.
Mirëpo, ambasadorja e Kosovës në SHBA, ende nuk e arsyetoi e as nuk e demantoi nga e kishte marrë lajmin se Kosovën e ka njohur Xhamajka.
Sidoqoftë, konfirmimi për njohje nga Xhamajka duhet të sqarohet. Është pjellë e Vlora Çitakut, apo e Hashim Thaçit?
Njohjet e shtetësisë dhe tërheqjet eventuale, janë kompetencë e Ministrisë së Punëve të Jashtme dhe ministria e ka për detyrë ta thotë çdo gjë që shtrihet në këtë dimension.
Sidoqoftë, njohjet e shtetësisë së Kosovës kanë një historik partizançe. Kujt i është tekur ka thënë se unë e solla këtë njohje apo unë lobova për këtë njohje!
Ka pasur, madje, edhe emra të estradës muzikore dhe të skenës së spektakleve të bukurisë, që me të shkuar në Indi a gjetiu, kuptohet për qëllime private apo aventureske, e kanë arsyetuar shëtitjen me lobim për njohjen e Kosovës!
Po ashtu, Behgjet Pacolli, edhe kur nuk ishte ministër i Punëve të Jashtme, shumë herë e ka marrë meritën e njohjeve për vete!
Sidoqoftë, Kosova kishte arritur t’i kishte 116 njohje nga vendet anëtare të OKB-së. Por, sipas Serbisë dhe Ministrit të Punëve të Jashtme të Serbisë, Ivica Daçiç, njohjen e Kosovës e kanë tërhequr 15 shtete.
E, në anën tjetër, as atëherë e as sot ish-ministri, Behgjet Pacolli, nuk i ka treguar opinionit kosovar se sa shtete e kanë tërhequr njohjen!
E, njohjet dhe tërheqjet, siç dihet, duhet të bëhen me dekret kredencial.
Andaj, ministri i Punëve të Jashtme, Glauk Konjufca, duhet ta merr në dorë ligjin e kësaj natyre të njohje-tërheqjeve dhe të mos lejojë t’i futë hundët çdo kush në punët e jashtme të shtetit! Safet Krivaça /Kosovarja/